師徒的對話

無：「你呢招劍式，甚有劍二十三的味道。」

步：「師父，呢招係徒兒自創既，獨家的。」

無：「哦，自創，即係話呢招本來係世間所無架啦。」

步：「師父你真係明白事理。係喇師父，你可唔可以為呢招劍式命名呢？」

無：「無問題。」

說時遲那時快，只見師父拿起配劍， 隔空在崖壁上塗鴉，寫了個似字非字的 --- 「云十」。

無：「你既劍式，就用呢個字命名。」

步：「師父，世上奇字千萬，弟子愚昧，未見過呢個字。」

無：「係，呢個字，係為師自創。你既劍式本非世上所有，所以要用一個世上所無的字，先可以配得上你既劍式。 」

步：「咁呢個字點解？」

無：「呢個字，似雲非雲，似劍非劍，合晒合尺。」

步：「似雲非雲，似劍非劍…… 乜個劍字入面有個十字既咩？」

無：「識乜丫你。」

步：「係。咁 ，呢個字點讀？」

無：「唔，你可以讀做霸字。」

步：「哦，霸。咁師父點解你唔直接寫個霸字呢？」

無：「唔聽書。正如我剛才所講，個霸字係世間本來已經有的字，同你既劍招唔配。」

步：「師父你真犀利，咁以後每創一招就要造一個字，嘩師父你勁過倉頡呀。」

無：「雲，低調點。」

步：「係。但係師父我怕人家睇完個字唔識讀。」

無：「咁，你以後每逢寫呢個字的時候，就響旁邊畫多個括弧，寫住(音：霸)，咁咪得囉。」

步：「哦﹗」

無：「仲有咩問題？」

步：「但係，師父，個霸字音都係世間所有個喎，我可唔可以用一個世間所無既音呢？」

無：「唉，你鍾意啦。」

步：「咁，云十云十…… 不如讀做個 "sir" 字丫？」

無：「萬萬不可﹗」

步：「下？點解？」

無：「因為個 "sir" 字音係番文， 並唔係世間所無。」

步：「嘩，師父見多識廣，吾等不及。」

無：「沒事。只不過當年師父家門遭逢巨劫，被迫流落異鄉，飄洋過海去到阿美利堅賣豬仔，所以學左少少洋話咁姐。」

步：「咁師父你一定係識好多字架喇﹗」

師父聞言，垂頭不語。良久，一滴眼淚從師父眼眶掉下來。

步：「師父，弟子失言？」

無：「沒事。驚雲，你了左江湖事之後，唔好再打打殺殺了。有時間，進修一下，讀多點書，勝過你增加內力百倍。」

步驚雲欲再問下去，只見無名搖搖頭，轉眼已過萬重山，身影隱沒於月光之中，只留下幽幽的幾句誦詩：「……風雲驚天變，無名復無名。少壯不努力，老大徒傷悲……」

步：「做咩事呀師父佢？」

此時鬼虎現身，向步解釋：「無名佢係感懷身世。佢慨嘆自己當年冇好好讀書，結果要出來舞刀弄槍搵食，更累及妻兒。你估佢唔想寫個霸字贈畀你嗎？佢唔識寫呀。仲有，你知唔知點解佢叫無名丫？佢唔識寫自己原本個名，怕人地問起或許填form個陣尷尬，先至索性叫自己做無名咋……」

步驚雲聞言感到非常震撼，內心久久不能平復，於是佢打低絕無神之後，借住救聶風為名，跳崖隱居，潛心苦讀十二年； 又改名為「步經勻」，以表矢志讀遍四書五經；更將天下會改組架構，成為非牟利組織「天下同學會」，以「讀勻天下經，步向光明路」為口號，提攜神州子弟研讀文史哲法政等學，不在話下。如此結局可謂意料之外，情理之中。