少壯不努力

和女同事乘車返公司，暢談為人父母的苦與樂，其間她忽爾提起，「現在生活很磨人，子女生活開銷也不算了；早知如此，當年應該更努力，升到某個上位賺到某個月入，儲多個錢，才是王道」。我即時拍案驚奇，原來一個表面淡淡定定的女子，竟然會如我一樣有這種想法。

是的，我本應該勤力讀書啦；學好英文啦，唔好老師叫睇英文書，就次次都只係抄個序加埋後記當係閱讀報告交貨；會考應該好似人地咁狂做pass paper，而唔係一份都冇做過仲要日日煲大時代啦；讀大學應該揀科真係實用搵到食，而唔係聽人講前途好似幾好、靚女好似幾多的科目去磋跎歲月；應該用盡青春參加交流同埋畢業歐遊，而唔係為興趣為責任去搞話劇；應該一畢業就考份政府工或者警察消防海關甚至救護食環文員啦，總好過依家搵朝唔得晚；應該整容去溝富家女、或者富婆；甚至，我應該好似中華英雄入面個失明吳震宇咁樣連老婆仔女都唔要，全心全意建功立業……

但係，我確實天生就唔係這種目標為本的人嘛。

如果我是，我一早就做了上述所講的偉業。但正所謂悟以往之不諫，正因我不是這種人，後悔都無謂，所以，其實，我依家響度說天說地說空虛，都係冇咩用，不如棟高床板，諗下點樣已現有條件資源，過一個「豐富而踏實，又掌握到幸福」(quoted from 呂良偉@富貴門)的人生，仲實際啦。