矛盾的模範生

近來多留意了工會新聞，有感到發。先談談樓下的清潔工。

要成為模範清潔工人，最緊要是甚麼？團隊精神。清潔工人集合在一起也可算是紀律部隊，最緊要甚麼？合群。哪怕洗手間早已乾淨了，你見同事仲洗緊地，你咪一齊去洗囉，就算已經有十個人洗緊同一個廁所，你怕啥呢？多你一個不算多，少你一個你就執輸了。

仲有，做得清潔工，一定要保持環境清潔。唔係要你晉身環保分子咁偉大，只係如果你唔搞衛生，你仲有咩可以或者識得做呢？不務正業者，遲早被人淘汰。故此，舉凡見到地上有膠袋呀、紙屑呀、果皮呀，諸如此類，各位一定要身先士卒蜂擁而上去執捨啊。當然執完之後丟唔丟就係由各位的自由意志決定。

而要在整個行業中出類拔粹突圍而出，其精髓所在只得三個字：不居功，同埋放膽做。不居功者，簡單如勞動過後宣佈一句：「這些膠袋紙屑果皮統統我都無份執拾的。」多大方。至於放膽做，換句話說就是不要怕尷尬，例如今天早上你向某人怒斥「點解你生到好似成督屎咁既呢死橙」，同日下午如果你對那人有事相求，不妨說句「偉大的長輩啊，願原力與你同在，我看你真愈來愈靚仔了，真的，不騙你，騙你就腸穿肚爛，不‧得‧好‧死。」放心，他一定不記得你早上說過的話，只有小氣仔才一清二楚銘記在心。至於那個誓言會否成真，就看閣下做化了。

又要操，又怕痛，多肉酸呢。