天下文章一大抄

蘋果日報 / C02 / 2010-01-14

《老友狗狗》劇名橋段似十足無綫竊取亞視07爛尾劇

無綫抄襲潮一浪接一浪，現時TVB播放馬浚偉、鄭則士和鍾嘉欣主演的劇集《老友狗狗》，竟爆出涉嫌向由袁文傑及張文慈孭飛的亞視07年爛尾劇偷橋，兩劇不止名稱相同，就連橋段也同樣描述退休公僕轉職狗隻訓練師的故事，實在巧合得離奇。無綫《老》劇被指盜版但仍收視高企，ATV眼白白睇住無綫得益，袁文傑只能嘆謂：「只怪自己唔夠爭氣。」

雖然無綫劇集屢次被指抄橋，早前《宮心計》將韓劇《大長今》及日劇《篤姬》集大成，《巴不得爸爸》也明以電影《新難兄難弟》作藍本，想不到現時播放中、由馬浚偉、鄭則士、鍾嘉欣、黃浩然及邵美琪等主演的《老友狗狗》，也再度捲入激抄行列。

原來亞視早於06年9月已籌拍同名劇《老友狗狗》，由袁文傑、張文慈和陳寶轅等演出。當時袁文傑還被安排往上水狗場接受訓練犬隻課程，又將頭髮剪短，且拍下宣傳片於同年底的節目巡禮上播放。據知當時亞視版《老》劇已有故事大綱及頭五集劇本，計劃07年推出，惜最後因財政問題作罷，還未開拍已爛尾收場。

未料無綫去年竟巧合地開拍同名劇，就連劇集內容及主角職業等也跟亞視版如孖生兄弟。無綫版描述警犬隊頭目鄭則士退休後開狗場，是名專業狗隻訓練師，飾演其女兒的鍾嘉欣開寵物診所，與以土法養狗的圍頭仔馬仔是鬥氣寃家，後來兩人為狗生情愫。至於亞視版就指袁文傑是海關關員，為替自己鋪退休後路而申請做領犬員，後來結識了寵物店東主張文慈，二人同樣為狗擦出愛火花。

無綫疑借亞視爛殼當寶，《老》劇如常獲慣性收視撐腰，上周平均收視31點（198萬觀眾）。亞視開井，遲來先上岸的無綫卻飲頭啖湯，袁文傑昨接受訪問時在電話中說：「我係拍過呢套劇嘅宣傳片，頭髮都剃短埋，仲去咗狗場上堂，結果胎死腹中，因為嗰時公司管錢嘅人唔批。」他聲稱沒看過無綫版《狗》劇：「唔想睇啦，都知乜事啦，又係公僕又係狗，成個感覺差唔多一樣。」

對於無綫明抄亞視劇名及涉倒模內容，袁文傑說：「死無對證，唔知對面點樣獲得呢套劇嘅古仔，但證明係好嘢，當年我哋冇拍到錯失機會，只怪自己唔夠爭氣。」

當時掌管亞視戲劇組的前高層楊紹鴻昨則說：「亞視喺06年係諗住開《老友狗狗》，最後冇錢冇開到。」無綫涉偷橋，楊紹鴻謂：「天下文章一大抄，但抄到咁接近，我就不願置評。我相信係一啲創作人同製作人嘅操守有問題，可能有啲創作人過咗TVB，又提過亞視有套咁嘅戲啩？但因為亞視開唔成，套劇冇版權，所以都冇辦法。」

無綫版《老》劇收視好，更顯得亞視走寶，楊紹鴻直說：「亞視走咗好多寶啦，我喺亞視年代都提出過好多戲，好似金牙大狀、宋世傑同葉問，但都係冇開到。」亞視公關部發言人昨則說：「我哋喺06年已經出咗《老友狗狗》嘅古仔，係咪偷橋就等觀眾自行評定。」

如今《老》劇收視高，主角馬仔當然風騷，他昨說：「呢次做圍頭仔喺形象上有突破，但我對收視平常心，點知咁受歡迎，反而有意外驚喜。」

雖然亞視的收視長期偏低，但多年來也有不少精采和有噱頭的節目，多次威脅以大台自居的無綫，後者更搬字過紙抄襲推出迎戰。

《成吉思汗》VS《成吉思汗》
87年亞視大張旗鼓，請來劉永遠赴內蒙拍攝劇集《成吉思汗》，無綫不甘後人，急急召來萬梓良拍《成吉思汗》，並搶在10月播映，亞視則在12月下旬才推出。

《城市追擊》VS《今日睇真D》
94年製作八卦節目《今日睇真D》，一舉成名，捧場者眾，令無綫跟風製作同類節目《城市追擊》，更選在同時段推出打肉搏戰。

《向世界出發》VS《星光伴我行》
00年亞視推出知性節目《星光伴我行》，由藝人帶觀眾以感性及知性角度走遍世界，有別於一般旅遊節目，大受歡迎，無綫03年照辦煮碗開拍《向世界出發》。

《一筆out消》VS《百萬富翁》
01年亞視從英國引入遊戲節目《百萬富翁》，收視高達39點（約250萬人觀看），無綫即購入另一同類節目《一筆out消》還擊。

《香港先生》VS《亞洲先生》
亞視98年首推出《香港男士競選》，反應熱烈，05年再辦《亞洲先生》競選，同年無綫舉辦《香港先生》應戰。

* * *

當晚，無記反擊。

* * *

東方日報 / C02 / 2010-01-15

曾勵珍着火法律追究《蘋果》

有報道無綫劇《老友狗狗》與亞視未拍攝的同名劇如出一轍，令無綫製作部總監曾勵珍非常震怒，昨午臨時開記者會澄清並採取法律行動追究，珍姐更怒斥：「砌個『竊取』罪名，講到好似做賊咁，好大傷害！」

珍姐發火非同小可！身為無綫製作部總監的曾勵珍，昨就《蘋果日報》報道無綫劇《老友狗狗》抄襲亞視未開拍但已有劇本的同名劇而怒不可遏，因涉及創作人操守問題，珍姐為正視聽，昨午率領《老》劇監製梁材遠、編審蔡婷婷等，以高姿態急急召開記招，席上則由外事部副總監曾醒明手持《蘋果日報》發言。

曾氏稱，無綫看到此篇報道後非常震怒，因有感相關說法對同事不公平，現交由法律部門去信《蘋果》跟進，曾氏續稱此報道對無綫信譽有影響，可能令廣告商有另外睇法，故需澄清，目前以「聽其言，觀其行」態度去處理。

《老》劇早於08年開拍，當時暫名《好狗出更》。會上珍姐愈講愈着火，她坦言看完報道很嬲，並已翻查資料證實該劇是○七年五月已存在，當年劇名為《好狗出更》，為編審蔡婷婷個人構思。珍姐說：「大家用心用力做，依家畀人砌成『竊取』罪名，講到好似做賊偷人嘢咁，好大傷害，我哋同傳媒關係唇齒相依，以前有類似嘢，但有娛樂成分都可以接受，但今次指控嚴重，好難啃得落，對同事好大侮辱，有冇搞錯！」問可有睇過亞視《老》劇？珍姐嬲爆說：「佢哋拍咗出嚟咩？畀個天書、橋段同故事大綱我睇吖！有（構思）點解唔拍呀？（有傳冇錢開拍？）個古仔係我哋三個腦諗出嚟嘅，（有暗示係創作人操守問題？）邊個員工吖？叫佢講個名出嚟！」

珍姐席上多次力撐同事用心創作，同場的編審蔡婷婷狀甚委屈，幾乎想哭，珍姐指蔡為無綫十多年員工，她說：「唔通十幾年前就抄呀？」委屈不堪的蔡婷婷接着說：「我○五年開始養狗，構思係想將正確養狗訊息畀觀眾，所以提議畀材叔（監製梁材遠），再開始籌備。拍狗題材好難，故搵受過訓練嘅警犬，過程唔係抄襲，係抄就係抄自己同隻狗嘅經歷，今次我覺得好侮辱，呢啲係創作人心血，不明不白負上罪名好傷害，要攞番個公道同清白！」

* * *

我有看無記即晚的記者會錄播片段，兩名疑似未斷奶的男女娛樂主播更是加多兩錢肉緊，義憤填膺地指摘有些傳媒無道德，講到好似自己間公司好有咁。

曾女士在會上曾怒斥蘋果：「你邊隻眼見到我竊取？」蘋果又係傻的，當正自己係中央，就咁話人竊取機密就得？要講證據的，就算人家劇名內容角色設定全部一樣，你都唔可以話人地抄嫁嘛。就正如林峰拿亞太區最受歡迎香港男歌手獎，你都唔可以話人地做馬個喎。你邊隻見到人地做馬先？話唔定人地係講緊亞皆老街至太子道西區呢懶醒。依家賴左野，點算呢？道歉啦。不過不用太認真，是旦得架啦。