成熟

運輸及房屋局長鄭汝樺在高鐵之役決戰前夕，接受TVB專訪，當中奉勸反高鐵的青年人要成熟一點：「青年人有熱誠係好既(潛台詞：但你地就例外)，即係我地都係年青過架下(都冇你地咁Q離譜，精英嘛)，我地都經過果個階段(之不過高你地幾班)，咁當然我地都想佢地用同一個成熟既態度呢，係去睇返我地今次果個事實囉。(冇得鬥架啦，收皮啦死仔)」

指摘人家不成熟，是最容易說出、又最百搭、最男女老幼皆宜、兼且看來比較厚道的批評，例如「你成熟點啦好冇」、「你好唔成熟囉」、「點解你咁大個人都咁唔成熟架」。講的那位年紀可大可小，但都有一個共通點，就是說話時總會理直氣壯得自己像是全球最成熟的人瑞般，自覺食鹽多過人家食米到腎衰竭的程度，彷彿自己已是六道輪迴經歷過七七四十九難九九八十一劫。此時，你真是無謂反駁，反正人老了，聽覺多數有毛病。

甚麼是成熟呢？我認為鄭局長心中的對立面，應該是青春。青春的定義人殊言殊，如果要找個比較有feel的，我會引用陳姑娘的偶像假音人的歌詞「甚麼是青春」……

青春是一頓吃不完的午餐
青春是一啖不會化的痰
青春是血肉在體內翻兩翻
青春是殺人後眼也不會斬

青春是抉擇讀書或者上班
青春是快活早晚愛消閒
青春是虛幻或許存於腦間
青春是美夢又遠去於瞬間

成熟了，人就會計算。老闆每天都囑咐你做盡膠事，俾著以前你唔一早劈撚左炮？但依家你唔會囉，駁嘴都無謂，打份工之嘛，又唔係過人世，日日舔下鞋底就月薪五萬喎，你畀我丫。老闆叫你買兇殺人？挑買兇之嘛殺人果個又唔係你俾人殺果個更加唔係你，有咩好怕。

放工後遇上一個七頭，這個人連人帶頭都很七，七到你好想大巴大巴車過去。但你交了這個朋友，嘩，大水喉喎，係咁過客畀你，做朋友之嘛，又唔係過人世，何不嘻嘻哈哈又一天呢？於是你連忙從公事包拿出雞頭與黃紙，又斬又燒攬頭攬頸不亦樂乎。

返到屋企，對住個由朝到晚只係識坐響屋企結果愈坐愈肥與梳化融為一體的女友，你有一刻衝動把她飛了然後把另一個女友接回家中。但你沒有行動，因為你想到她為你生了個女而且仲打理你間九百呎豪宅打理得算係咁，你就會諗，何不keep多條女以傭不時之需？斬纜太高代價了。

青年人就低能得多了，衰衝動。有工唔返走去搵所謂的理想，有錢唔賺走去求所謂的公義，明知自己咩都唔知就走去搞咩所謂的運動，結果當然係俾人笑到面都黃啦。俾人笑完都唔夠，仲要死撐話自己唔會放棄，結果俾人笑多穫。

青年人，你咪話我睇死你。假如這刻，有一大班人正在高聲地屌你，你明知有機會被人以更大分貝地屌、甚至被人郁手郁腳，你也必定會走到他們面前據理力爭咬贏佢地甚至大力反屌，而絕對不會懂運用戰術智謀，抱住留得青山那怕無柴燒的高等智慧，忍一時之氣敗走地鐵。

所以註定你一世俾精英階級騎住。