鬼故

獨居的羅浩明，家中近日發生怪事。

他趕住出門沒有摺被，回家卻有整齊的床舖；慣了脫下了便放到一旁十日也不洗的衫褲，無端會洗淨熨貼的放到衣櫃內；胡亂棄置在檯上的便當殘渣，竟然日日清不特止，更換成天天新款的美味無味精料理；諸如此類，不可勝數。

羅浩明肯定不是有賊，因為沒有賊如此慷慨。他懷疑是有鬼，雖然他不信怪力亂神之說，但仍尋求了幾位師父的意見。綜合來說，師父們都指他是厲鬼纏身，建議及早化解為上，除了其中一位師父補充一句：會唔會係你阿媽幫你執屋冇同你講呀？

冇可能啦，羅浩明心想，我屋企人去晒啦，冇人冇物，鬼得閒幫我執屋。這時，他想起一個人，張小芬。

張小芬曾是他的同事，泛泛之交的同事。只有一次，因為公事關係，張小芬上了羅浩明的家，逗留了短短幾分鐘，臨走前淡淡地吐出一句：你間屋亂成咁，我做同事都真係抵唔住頸想幫你執。羅浩明記得當時好像回了句：好呀好呀，求之不得，之類的話。

冇可能啦，羅浩明心想，張小芬半年前已經死左，好似唔知咩病定係意外，佢都唔記得了，反正都冇做同事好耐，係舊同事響msn同佢講佢先至知。

算啦，總之事不關己己不勞心，依家最煩就是間屋成人俾唔知係人定係鬼搞到亂晒，不，搞是搞整齊了，卻耐人尋味得令人不寒而慄。愈想愈氣，他在家中毫無焦點地大叫大嚷：我唔理你係人係鬼，總之你唔好再玩野，如果唔係我打爆你……

已經成了鬼魂的張小芬，飄浮在羅浩明的頭上三呎位置，幽幽地道：點解我為你做咁多野，你都唔明白呢？你唔念我幫你打理家頭細務，都應該念下我為你而苟延殘喘於人間世呀。

此時，路鬼甲剛巧經過，搭訕道：俾著你，日日返到屋企，樣樣野都俾人郁過晒，又唔知發生乜事，唔驚就有鬼啦。你這不是愛的表現，是雞婆啦。

張小芬恍然大悟，不認不認還須認，她是太多事了。放過人放過自己，她心想。然後，她揮慧劍斷情絲，切斷了羅浩明……和她之間的那條線。然後，她慢慢地愈飄愈高，飄到上天宮。在那兒，她看見遍地都是快樂和希望，執都執唔切。

早知早點上來啦，張小芬揼著心口地呻笨。