期望

陳姑娘說：「我的期望很簡單，只要川仔健健康康成長，開開心心生活就好了。咁你對川仔有咩期望呢？」

我答：「我都好簡單，只要他健康開心就好了。當然，最好就係聽教聽話啦，好快戒奶戒尿片，生性些少，醒目些少，快點入到好的幼稚園，氹到老師好開心，寫好個report，升上間好小學，仲要係一條龍，自己識定時定候做功課同溫習，無驚無險入band one中學，可以玩下野但係唔好玩創個心，可以溝下女但係唔好溝出條命，自動自覺升上港大中大最少都要科大，理工呢種野雞大學就無謂入喇，一畢業最好就做政府工又或者至少做份夠供樓的工，唔使我地養佢之餘仲可以養返我地轉頭，到時話之我份強積金蝕晒都唔使怕啦……」

* * *

古語雖云「人人期望可達到，我的快樂比天高」，但現實是人生在世你知我知，快樂無可能比天高，所以人人期望也絕非皆可達到。對於自己的子女，正常做父母的只能定下一個當時比較迫切但又看來可行的期望，才是王道。於是，當仔仔尚在母腹之中時，父母暗暗許願：「只要有手有腳，眼耳口鼻齊，健康開心就可以了。」

到臨盤在即，媽媽開始要求多了：「乖仔聽話，唔好搞咁耐，等媽媽生你舒服點。」生出來了，父母開心之餘也不忘說句：「無病無痛，聽教聽話。」出院回家，父母又許願：「唔好食咁多餐夜奶。」不久，爸爸許願：「保你大唔好再三更半夜嘈嘈閉。」

然後，就會是一山還有一山高的要求：「靜少少﹗」「唔好周圍跑﹗」「坐定﹗」「捨得食飯未？即刻埋來。」「唔好打機﹗」「溫多一陣書﹗」「點解默篇咁易的書都只係得85分？下次要95分以上。」「全班40人，你竟然考個第11返來？起碼要做頭果五個。」「希望你有幾多A(或5級)拿幾A(或5級)。」「爸爸媽媽冇所謂，你讀到書就得；不過如果有得揀，揀間好大學之餘，仲要揀有前途的科目。」「不如去考份政府工啦，藝術家有幾多個搵到食。」

就算個仔唔再十八廿二，仲要牛高馬大，做父母的仍會視仔仔為那個還是一歲牙牙學語步步為營的小孩子，口中不斷吐出那句：「唉咁大個人仲唔生性，幾時先識定？」大家辛苦的同時，父母卻記不起原來很多年前，你對他其實只有一個簡單的期望：「只要有手有腳，眼耳口鼻齊，健康開心就可以了。」

一路好走

那天聽到新聞轉述你的姓氏和年齡時，其實心中並非沒有一絲不安的，只是或許我個人太大意、或是太遲鈍、或是寫得多生離死別麻木了，直至媽媽嗚咽著來電說，出事了，我才驚覺，啊，原來是你。當時我還反問，媽你哭甚麼，媽說始終是親人嘛，我還覺得，也用不著哭嘛。

直至出席你那極盡榮哀的喪禮，感覺還是很疏離。因為事情搞得大了，我像是個觀禮的多於參與的。而且，那些異教儀式不屬我，官方儀式又把我們隔得遠遠的，甚至那場酒席中我看見同事們開懷暢飲，把我人也搞亂了，一下子回不過神來。

到我回家翻開相簿一看，啊，原來你和我家並非不相往來的。相片勾起了回憶，種種舊事都蒲出頭來。原來你和我家曾是鄰居之親，原來你和我爸是很有共同話題的，原來你曾到過我的婚宴，原來你也有到過川仔的滿月，等等等等。我一直以為和你家沒關係，原來不是的，至少和你不是。

知道你的家人已有很足夠的保障，但再多的保障也換不回至親，看見伯父伯娘的神情就知道。可憐他兩老還要接受現實地在兒子的遺體前向親友平靜地解說「你睇下，薰到乾晒、黑晒」。所以我不明白，為何傳統不讓看住兒子出生的父母也親眼目送兒子入土離世，我更不明白，為何當初我竟會萌起早知做你份工好過死了有錢賠的想法。

永別了B哥哥，一路好走。

海豚

海豚被迫表演，心靈會受創。 資料圖片

早前有新聞報導話，原來海豚的智慧比猩猩還高，僅次於人類；而研究更指出整天叫海豚表演，會令牠們感到不快，因此建議類似海洋公園的機構，別讓海豚工作得太辛苦。

我話：「噢，真殘忍，我地以後要杯葛呢種表演。」陳姑娘話：「咁我地呢？我地係萬物之靈，叻過海豚，咁係咪唔使返工？」


伸延閱讀：海豚被迫表演心靈會受創

Fanboys

都說感動總不能刻意經營，往往都是突如其來防不勝防的。

話說這夜看過方健儀報完晚間新聞，百無聊賴，於是又開始了我喜愛的轉台遊戲。我家now訂了40多個台，轉呀轉又轉，轉個不亦樂乎。然後我看見電影台即將播映「玩轉星球大戰」，我想應該是scary movie之類的唔使用腦搞笑片吧，點都可以解下悶，於是我就呆坐梳化等開場。

結果完場時，流了一地淚之餘，更換來一腔熱血。

Fanboys故事簡單得近乎老土，就說四個一起長大的星戰迷，重拾年少時的夢想，穿州過省潛入《星際大戰》導演魯卡斯的天行者農莊，來個朝聖之旅。這個圓夢之旅更有另一個目的，就是幫助罹患癌症、時日無多的其中一員，搶先一睹劇中即將上映的《星際大戰首部曲魅影危機》。一看牌頭就知是笑中有淚。

看到經典開場字幕說「都唔知這些字最後會飛去邊，話唔定不諳英文的外星人見到會大叫WTF」，已經笑出聲了。再見到貨車以光速行駛、黑武士被星艦迷嘲笑為呼吸道感染、肥仔試了十多年希望用原力令女友人脫去T-shirt、星戰迷激讚夏里遜福專拍經典從不拍爛片但下一鏡便出現六日狂奔七夜情電影看報，等等等等，簡直狂喜。

不過，到了後來，雖然調子仍然陽光，但劇情發展已令人唏噓不已，再加上配樂的推波助瀾，催淚啊。



至於熱血，是咁的，劇中兩位主角，一個對於日復日的刻板生活感到很無奈，但又責任堆滿面前逃不掉；另一個則惡疾纏身今日唔知聽日事。他們一度對於是否繼續計劃感到很迷茫，幸好星戰中的死亡之星，成為他們生命中的提醒：

You gotta find your Death Star. Greatest deed Luke Skywalker ever did was take down the Death Star. As far as I'm concerned, that's what everybody needs. You need that one bad-ass thing that lets you live on forever, you know.

感動到不能啦。

人地成日話買樓可以保值我打死都唔信

人地成日話買樓可以保值，我打死都唔信。

依家信晒。

冇野講，自己睇圖。

(圖片來源：高登討論區)

追風

自稱中藥世家的霸王有新出品，是去頭皮洗髮水，名曰「追風」。其實個名好型，型過霸王；代言人王菲也很型，型過成龍。問題出在口號上。

「中藥去屑 就是追風」

追風者，到頭來毫無結果，白忙一場。換言之，此句口號的意思可解作：「用中藥去頭皮？撲個空，得個桔啦。」

咁我仲用唔用好呀？


(圖片來源：keepxthexfaith.blogspot.com)

有Jackeline冇良心

我認為，你形象騎騎離離是品味問題，旁人無從阻止，你鍾意同老公玩食字互抽水爆瘡配貨倉也是閣下智力問題，別人無話可說；但，唔該，人家死者已矣，唔好抽人地水啦好心。家陣個仔又不是你的，你問過人地阿媽俾唔俾你玩到咁大未呀？宣傳無罪，但有品才可貴呀，你睇你依家低到呢，真是好撚難睇。

仲有，話過你好多次喇，終極不是動詞，「暗瘡是可以終極的」這句，完全是九唔搭八的。就正如我話「Jackeline的良心是可以狗糧的」，意思明白，但文法不通囉。

(圖片來源：壹週刊)

有錢有科技

陳姑娘出了部HTC Magic，日日上網，十分囂張。

我心生不忿，晦氣地說：「真係唔明，點解科技弱能者所用的手機，竟然比我這種走在時代尖端的科技小郎君所用，還要先進﹗」

陳姑娘不慍不火，邊上網邊說：「唔關識唔識科技事的，係錢的問題。有錢就買到幾high都得，使乜識呢？」

我又完全敗陣了。


(圖片來源：www.htc.cc)

陳姑娘心目中的GPS

陳姑娘自稱自己部手機用了足足五年，係時候要換，終於昨晚轉了台去時乜通，兼且出了部零機價的HTC magic。其實陳姑娘頗算是科技盲，除了識得玩sims或寶石方塊外，對新興技術大多一竅不通。故此我曾一度建議佢唔好出smartphone，但以她一貫自以為好醒並且頸好硬的性格，當然聽不入耳。勸告不成，我只好搵機會取笑佢。

舉個例，她得知自己部機有定位，但係又唔知咩係GPS、咩係google map，於是叫我幫手set。Set完，佢一邊話好得意一邊話好驚俾人知自己去向，仲要響個廳走來走去。我問佢做咩，佢話：「我想check下個定位會唔會跟住我走。」大佬，國防科技都冇精確得咁交關啦，況且你個廳都冇幾千呎去就個誤差啦。嘩哈哈﹗

點雪糕

老夫老妻食過晚飯，走到哈根大師，看看有甚麼新款式好吃。

我和陳姑娘不約而同看中一款，但名字太青春了，不太好叫出口。我見圖畫中又雪糕又香蕉又盛咁，於是我靜靜地對那侍應哥哥說：「唔該……唔該我想要呢款香蕉船丫。」

好傢伙，那廝竟然埋滿笑容狀甚禮貌周周地高聲回應：「哦，先生你要我地的新出品『愛情號』嗎？好﹗先生，『愛情號』係可以選三款口味的雪糕架，咁你想選邊三款雪糕放在『愛情號』上呢？」重複產品名字三大次，成間店都聽到，佢公司真係多得佢唔少，我都係。

幸好陳姑娘當時發緊呆，不然肯定會當場大笑，就如事後我向她覆述時的情況一樣。