心癢癢

最憎睇八卦雜誌當中的得啖笑假名明星醜聞專欄，講些唔講些，甚麼「肌肉小生夜會模特兒小花」、「得意大家姐姣溝動作型男」，內容絕核，但又永遠都估唔到佢講緊邊個，搞到人心癢難耐，晚晚咬毛巾。使唔使走法律罅走成咁呀？

日盼夜盼不知幾時會有個白痴明星仔睇完那些專欄後，忽然認出故事中人正是自己，繼而走出來大呼小叫地罵陣曰：「做咩講我呀？夠膽開我個名丫，笨﹗」果真有如此笨賊，實乃廣大八卦讀者之福。

又或者，不知幾時會有個白痴明星仔睇完那些專欄後，以為故事中人正是自己，繼而走出來大開記者會高聲呼冤，最後卻發現原來佢自己唔爆的話無人會知佢係主角，到時真係會將全身器官都笑爆的。