【我決定今年之內減到二百磅樓下】倒數第45日之我決定減肥

肥可以很討人可愛，也可以很討人厭。當然人家如何看肥人，我是不用理會也理會不到的。但說實在，肥的確是壞。就只說行路吧，肥人行路慢，又跑唔快，仲要欠速度，又會喘大氣，又會流大汗，大腿兩邊內側不斷磨擦令堅強的牛仔褲往往夭折，買褲又難買啦始終香港肥人褲專門店唔多執下一間執下又一間，行多兩步或者上落樓梯雙膝仲會有時痛到想跪地，有時見到街上青春少艾穿上緊身衣物時上面波濤洶湧而我就特登穿鬆身衫都搞到中間呼之欲出，想起也覺忐忑。

但，信不信由你，我在這個步向中年的關鍵時刻，決定要減肥，以上原因皆否。我只是想減肥，僅此而已，沒有甚麼目的。要說有目的，其實，我就只是想給自己一個目標而已。

因為，都到了這個年紀，心中其實有很多計劃想實行，例如想改變這世界。但那天我呆坐在一道舊樓暗黑樓梯等候工作時，忽發奇想，如果我連改變自己身體的勇毅都沒有的話，我有甚麼資格走下一步？古語說得好：「修身，齊家，治國，平天下。」可見一個人若要稱霸天下，必先要修身。

於是，我在facebook打下這一句：「我決定今年之內減到二百磅樓下。」

我要公諸於世，因為如果只得我自己知道自己的計劃，那麼不出三日，世上便再沒有人知道這個計劃的存在。所以，我要大家都知道，到時我便沒有退路。

果然，鼓勵與鞭策排山倒海。至截稿時留言如下：依家已經11月。。。可以極速減嗎？ / 你而家201磅？ / 但你而家幾多先？ / Support good sign / 你唔想同我老世同等級了? 令人懷念的熊貓couple / 今年? / easy, let us help you / Or...原來你喺二百磅樓上既.... / 幾時再去食自助餐？ / 你想打二百鎊咋卦 / 十二月前打多轉邊爐啦 / 無野既，做人既野，好快就習慣認輸同放棄架啦

於是我又留言：「我唔怕話埋畀大家知我依家重達235磅，但既然有人宣稱 Lost 30 pounds in just 4 weeks，我是鐵了心了。不用勸止我了，鞭策我吧。」

然後再有回應如下： 哦，你基數大，%唔係好高，無問題呀 / Ging! Support / 咁鬼唔望你真係天天被別人屈你宣稱Lost 30 pounds in just 4 weeks! / 聽說你上次食novete肚瀉bor....去食多幾次啦~~(本人澄清：肚瀉那間是六國) / surely will be good to you, but dun rush because of competition or whatsoever for your health sake :-) / 好！ / I super support u. what's the plan for this target, at least must eat less (say 70% full) + exercise.

至於當面對我的建議也有，「你可以做多些運動，之前我老公日日做運動，一個月減左六磅」，「一個月減三十磅？你剩係吊鹽水都冇可能呀我話你聽」，「你有冇諗過切左個胃」。

嘿嘿，總之，冇人可阻止我了。今次我完全是不成功不收費便成仁。至於如果唔成功要點成仁，我暫時未諗到。

「工欲善其事，必先利其器」，要減肥，首先要預備甚麼呢？畀三秒鐘大家估下……

……

……

……

開估未？

無錯，就是磅。

除了買磅，我其他付諸了的行動還包括早餐吃了一大碗無糖麥皮。是麥皮﹗我討厭到叫自己個仔唔好食的麥皮﹗今次我仲唔贏？

放工回家，我見菲傭正準備晚餐，隨口問她弄了甚麼。「Fried pork chop ar, sir.」Shit，我唔記得菲傭係冇add我facebook架﹗