歡送會

爸爸媽媽去了參加教友的歡送會，叮囑我留在家中，照顧原本理應由我照顧但現時長時間由他們負責看管的孫兒、即係我個仔。

關於歡送派對，那是經常有的事，出國移民跳槽退休結婚生仔做老襯，理由有九萬個，形式都不外乎飲飲食食唱畸打機諸如此類。

但爸爸媽媽今次出席的歡送會比較特別，主角不久將會離開大家，一去不返。對了，是永別。

派對會在醫院舉行，主角患了病，已到走不到路的地步，甚至回內地就醫也已是不行。去日苦短，他大可以選擇躺在床上等死，無人會怪他消極；但是他要求辦這個人生終極歡送會，讓他一次過向親友說再見，親友也可與他餞行，兩得其所。

能夠死前仍有時間和掛念的人話別，以我有限的體驗來判斷，該是好的，總好過突然死亡、連講句「我真係好愛好愛你，記得飲旺仔牛奶」或「今晚唔使等我食飯以後都唔使」甚至「暗號係萬里長城萬里長」的時間也沒有。

順帶一提，神也真待他不簿。前幾年安排他的公司被人收購，讓他得到一筆不少的財產，新老闆見他患病，竟好人得加薪不特止還准他每周只須上班一至兩天，讓他既有收入又可休養。當然你可以話，如果神對佢咁好做乜叫佢死呢，但我也可以話係人都會死，死得安樂總是有福的。

我個仔正在攣弓蝦米熟睡當中。我望住他，不禁想像，假如這一刻我突然要回天家了，我要向他說甚麼對他一生受用的遺言、就如那些偉人的父親臨終時對兒子所講的呢？真係太多說話未曾講，諗爆頭也諗唔到。不過，其實，現在費煞思量亦多餘，我個仔一歲都未夠，根本就不會明白我講乜啦。