哥哥要愛護弟弟的理由

有時真覺得如無必要就別跟陳姑娘，因為她滿口都是真理，你駁她不到的。

就好像前幾天，陳姑娘開始和川哥哥上德育課。題目是愛護弟弟。

陳姑娘說：「阿川，你一定要照顧弟弟呀。知唔知點解丫？」川搖頭。陳姑娘續道：「因為你永遠都大過弟弟架嘛﹗」

你看，駁不倒她的。

蘋果貼紙

不理陳姑娘的冷言冷語，小弟斥巨資買下iPad，心感興奮。

打開包裝，發現除了主機、配件及簡單的說明書外，還附送兩枚精美有型的蘋果logo貼紙。

我滿心歡喜地對陳姑娘說：「哈，你話張貼紙貼響邊度好呢？」

陳姑娘答曰：「貼響額頭啦，咁型。」驕傲的心登時被冷水澆熄了。

好婆媳

陳姑娘向我複述了一件日常事。

她說，某天我上班，她放假。她和我媽媽即她奶奶以及小川及小安一行四人，到樓下的餐廳吃午飯，席間言笑甚歡。

鄰座有位老婆婆，看見兩個小朋友很有趣，於是不斷「奀姑姑」的逗他們玩。當然也有和她和我媽媽談一些育兒心得。

吃過午餐，她和我媽媽即她奶奶以及小川及小安一行四人結帳離開。臨走前，她向小川說，來，拖住麻麻的手才好走。

老婆婆聽見，一臉驚訝地說，喲，原來你們兩個是婆媳？我還以為你們是母女來的﹗真難得，現今世代很少有如此好的婆媳關係了。

陳姑娘總結說，那位老婆婆應該有很多不快的經驗吧。

我同意，但加多句：「陳姑娘，你曲線讚自己的技巧，精進不少了。」

浪漫的相反

前幾天，我同陳姑娘講，話遲下有隻日本發明的walkman，如果想share自己聽緊的歌俾人地聽，唔使除個earphone畀人，只要拖住對方隻手，就可以經過個身體過電，你話係咪好浪漫呢？陳姑娘答，一丁點都不浪漫，只令我想起一個人。我問，你想起誰？陳姑娘答，三叔。我話，what？陳姑娘隨即自言自語地說：我掂你個頭，就知你諗過乜；掂你個口，就知你食過乜；掂你雙手，就知你摸過乜；掂你既……er er er (作閃避狀)

得失

那天和陳姑娘講起Big Four，她說他們是不折不扣的「堪坷四人組」。

我說此話怎講。她說：「蘇永康呢，就吸毒搞到聲名狼藉；梁漢文，只係講左句粗口，前途毀左一大半救唔返；張衛健，條命唔好，成日紅一陣霉一陣，辛苦命。」我問：「咁許志安呢？」

陳姑娘高呼：「佢最慘﹗咩都冇做過，無啦啦成個人由紅極一時突然坐過山車咁，唔知點解就咁超級dup鬼左﹗」

* * *

雖然陳姑娘如此說，可能是出於歌迷所有的偏頗，但許志安無故沉底的確乃是實情。人生就是這樣（上述此句乃係抒情文必備之轉折句，寫作班學生宜乎留意），好多事情，當下你不知道為何，過後也不會知，只剩心碎了無痕。

前陣子要做功課，上網查名言，發現這句久遺了的座右銘：「是非審之於己，毀譽聽之於人，得失安之於數。」是非要由自己去判斷，褒貶則只能任由旁人去說。至於得失，噢，你認為除了謀事在人成事在天之外，我們還有甚麼可自誇的呢？就好似你有粒飛滋好痛，想佢謝，唔通你叫佢佢就即刻謝俾你睇咩？

一個人無端端咁運滯，除了令我想起約伯外，也令我想起一段金句：「我無論在什麼景況都可以知足，這是我已經學會了。我知道怎樣處卑賤，也知道怎樣處豐富；或飽足，或飢餓；或有餘，或缺乏，隨事隨在，我都得了秘訣。」

要識得窮，也要識得富，反之亦然。悠然自處快樂人生，大抵如此。卸下重擔，努力活得開心就好了。

* * *

陳姑娘開始懷緬過去常陶醉，問我：「不如我們去睇Big Four澳門演唱會丫？」我答：「好富貴呀家陣，睇睇睇﹗」

鰭與肝

我問陳姑娘：「你支唔支持罷食魚翅呢？」

陳姑娘一貫的四兩撥千斤，舉重若輕地說：「環保是好；但有時老人家的意見也要考慮，始於傳統觀念並非一時三刻可以改變的。」

我再問陳姑娘：「即係你都會食啦？」

陳姑娘說：「我唔會主動叫囉。但係如果有，你冇理由浪費嘛。」

我三問陳姑娘：「咁你有冇諗過，其實食鵝肝都好殘忍？仲要係人類主動谷肥隻鵝個肝，搞到佢脂肪肝爭少少冇位放個心同肺，然後殺鵝取肝。點解外國人自己唔禁左佢，反而向中國人指三道四？係咪要破壞中國文化、干預中國內政？」

陳姑娘答：「車，關我鬼事？我都唔鍾意食鵝肝。」

(圖片來源：華網在線)

別嫌多

咱兩口子一不借錢、二不儲錢，可真如《蝸居》中的男女主人公般貧賤夫妻百事哀，欲置業而無從了。那天我發晦氣，對陳姑娘說：「我唔貪心，唔使多，畀我中到百零萬六合彩，夠交首期就得。」

與小弟同樣睇波不賭波以及相信不賭是贏錢的陳姑娘，未有如以往說甚麼「賭賭賭、賭條命」般曉以大義，反而在靜默三秒後理直氣壯地說：「想中，就唔好怕多﹗百零萬？我呸﹗」

雖然後來陳姑娘多次強調自己只是說笑，無意鼓吹賭博；但好明顯，冷靜如陳姑娘之流，也已經有被這個瘋狂的社會迫到埋牆之虞了。

(圖片來源：中新社)

老婆要求買名牌手袋的原因

陳姑娘：「老公，送個LV手袋畀我。」

我：「點解呢？」

陳姑娘拿住報紙說：「你睇，LV夠硬淨，可以擋鋼片架﹗你都想我同BB安全架嘛，係咪？」

我：「^&!*%#&*^&!*%^&*#@」

伸延閱讀：鋼片插腹 孕婦LV袋保命

(圖片來源：蘋果日報網站)

負責任的家長可以晒冷

話說有次出席家族飯聚，長輩問：「小華，你仲有養狗呀？」我答：「係呀。」

長輩勸：「狗咁污漕，會影響個BB架。有左BB，樣樣都要小心至好。」我說：「係。不過我想個仔做個負責任的人，既然係咁，我身為老豆的，冇理由做埋晒不負責任的事，例如拋棄隻狗，加嘛？」靜默三秒，長輩及同檯親友埋滿笑容齊聲附和：「係呀係呀。」然後繼續斛籌交錯。

我回家向未克出席的陳姑娘報告此事，說完沾沾自喜道：「拿，我一直話唔丟狗，我都話我咁諗係對到極點架啦﹗長輩都聽我的。」詎料陳姑娘一臉不屑但又不失溫柔地向我解釋：「人地緊係唔駁你啦。你搬得個仔出來，仲要玩到負責任咁大件事，晒冷啦，人地仲邊敢跟你？」我登時噤若寒蟬。

(圖片來源：karey@facebook)

無敵手機apps

驚天動地的偉大發明，往往是由無聊而微小的念頭所引發。

話說前幾天，我替陳姑娘的magic手機安裝taskiller軟件，好讓其電話不致因太過multi-task而拖慢效率。陳姑娘見狀問：「咁有冇apps可以加大個手機個memory呀？」我沒好氣，於是答：「有呀，有些apps直情將粒CPU升級呀﹗」

陳姑娘隨即說：「咁有冇apps可以download左之後，令部機身變薄些少架？」我答：「有架，仲有個apps可以加大個screen size添。」講完，兩條友在大庭廣眾下忍唔住係咁笑。

各位apps developers，不妨諗諗佢，做到的話，距離上市集資又會邁進一大步喇。