鑽飾

洛機儀在一個電視廣告雜誌中說：「我好鍾意同小朋友玩，因為佢地既笑容好靚……」重點是下一句，「……就好似鑽石咁靚。」

唔該，做宣傳都唔使做得咁肉酸呀，下話？如果鑽石真係咁討大家歡喜，斷估你也不會送玩具給節目內的小朋友，讓你拍下他們的笑臉啦？

完場前仲要叫糕浩證講句：「佩戴鑽飾會令你更動人。」再講句唔該，你以為仲有人會咁無知，以為換過件衫執下個樣就好掂啦咩？做明星(或撰稿員)作得出如此言論，可謂經典。

唔好倒錢落海了，畀心機學做番個人好過啦。

慶祝阿月既入且出之夜

真要記下上周六的酒精之夜。

為了慶祝阿月姑娘出院燕爾以及入伙之喜，大伙兒到了顏總的家聚頭。咦，為甚麼月入伙不去月家反到了顏家？原因不明。

所謂嫁出去既女潑出去既水，是夜有六噸翡翠螺、二千打生蠔及一群三文魚任君享用，當然立即手執酒樽飲過不停啦。節目可謂應有盡有，take 6、搶食、倒捨可樂、無聊問答不在話下，邊替阿月畫公仔祝賀邊背誦危天行金句，更是整晚的重頭環節。

結果真是不醉無歸，失儀失禮，實在見笑，還請多多包涵。(雖然大家都唔係好得我幾多……)

聽審

一連兩日去東區死因庭聽審，冷眼旁觀，你知否我最大的發現是甚麼？

‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧
‧

原來心臟病是如此突發如此恐怖的﹗為了自己為了家人，我決定愛惜自己，好好保護身體，勤做運動注意飲食，仲要記住年年驗身，令你放心。

危天行之夜

多得梁錫和李美，自那晚飯聚後不斷回想危天行的金句，讓我興致勃勃。今天放工放得早，立即整理一下，娛人娛己。

* * *

「對唔住喎！有錢就真係大晒！」

「我要你一鋪清袋。」

「你有做魔鬼既條件，魔鬼既最大弱點就係用情太深。」

「出面果兩個同我打過仗幫我賺過錢，但係你唔同。你只不過係華文翰掃出黎既一舊垃圾。」

「虎父犬子呢。」

「我養你，唔係要你響我面前吠，係要你咬華家果班人呀﹗」

「我唔係幸災樂禍，我只係忍唔住笑姐﹗」

「因為你同我都有共同的敵人！」

「我唔係鍾意你聰明，我係鍾意你夠卑鄙。」

「男人身邊得一個女人，係因為佢冇能力。」

「唔夠人地高，就要學識企響巨人既膊頭，咁就睇得遠一的。」

「如果個人將你放係心中，無論你點對佢衰，你都會係佢心上；如果你唔係係個個人心中，無論你點對佢好，佢都唔會將你放係佢心中。」

「你…你…你……」

「呢個世界係冇永遠既朋友，亦都冇永遠既敵人。」

「有競爭先有進步。」

「有恩未必要報，有仇一定要還！」

「係我眼中冇愛同埋恨，只有贏同埋輸﹗」

「如果係真既話，我會好多謝你。」

「從來無人敢丟我部電話﹗」

「識得轉移視線，呢個女人好野呀﹗」

「紹芬。」

「Rocky﹗」

「恭喜你引狼入室﹗」

* * *

其實自超級靚聲演鬥廳起，我和陳姑娘已對伍小生另眼相看，更一度在繁忙的生活中破例追看這節目，為的只是希望看到他遊魂、食鑼絲、唔集中、唔理拍檔、甩beat、入錯位、講錯台詞等等的精彩演出。後來，關菊英當上細契，紅了，我已在想，幾時到伍小生呢？真希望他能重新上位。

不過，陳姑娘現時在人前人後，均否認曾鍾情伍小生。真是反面不認人。

攻心

在法庭上，用計，也攻心。

話說有一天，開庭前眾人靜默無聊，主控忽然對後座的案件主管說：「喂，有次，幾搞笑呀。咁我渣車啦，行左條山路，我老友響隔離位同我講，Peter，呢條路好多蛇架，你小心睇路。我梗係唔理佢，照渣，後來去到目的地，落車，一睇，嘩，嚇得我丫，成地都係蛇，果堆蛇，扁晒，一地蛇屍，恐怖得來又好搞笑，死左成群蛇我都唔知，哈哈哈……」

正當大家都摸不著頭腦、難明主控為何無端論蛇時，主控向辯方大狀道：「係勒，阿佘大狀牙，個同意案情呢你同意個可……」

明晒。

牛腩多汁少腩走蔥

是夜在茶餐廳與陳姑娘一邊吃晚飯，一邊看《歲月風雲》。看到劉松仁雖然欠缺摩打造車，卻想出買下敵人伍衛國的現成車然後拆下摩打裝上己方車輛時，心情激動到不得了，暗覺無記編劇也偶有諗頭。

但吃完飯，細想一下，咦，如此情節不就等於《同居蜜友》中鄭秀文倒掉了梁朝偉的牛腩汁於是被指令前往夏萍的店買一百碗多汁少腩走蔥的牛腩？車，搵笨。

倒是發現劇中飾演危天行的伍衛國，其浮誇程度與霍景良無異，但他太刻意了，未及郭峰般令我著迷。

久仰大名

小強結婚了，一位有才情的創作人娶了一位又聰明又賢淑的美人，真是絕配。很榮幸能參與其中做兄弟，卻怪自己幫不了太多忙，真是失禮。送上深深的祝福，盼他們永遠幸福快樂。

同場加映：遇上主播舊同學，寒暄幾句交換近況，卻竟引來報紙高層的注意，原來他是朋友的舊同學，青年才俊，我是久仰大名了，卻估不到會在這樣的情況下見面，老土也要講句世界真細小。才俊問：「有冇興趣過來做記者呀？」我竟傻呼呼地答：「我依家咪做緊記者囉。」說完也覺自己答得戇居，一點急才也沒有。

黑心大發現

你可以隨時和我說話，不論我是正在讀書抑或工作抑或看電視抑或聽音樂抑或大便，多忙多累我也願意講。只是不要在我熟睡時叫醒我、或對我說話，尤其是負氣話，我會睡不著的，數算千隻綿羊也不能闔上眼，翌日我必定頭暈又頭痛，兼且反胃作嘔同埋發脾氣，很辛苦的。

拜託，幫幫忙。

即管去玩啦

「不要以為一切都很完美，不要以為你出雞人家一定起碼會出豉油。

「你記不記得我們已經多久沒坐在家中的餐桌旁吃飯？我覺得一家圍在一起吃飯很重要，所以環境多擠迫也堅持要放一張固定的餐桌，每次早收工我也例必立即回家。可你呢？不是約了朋友吃飯就是約了同事閒談再不然就是開一些隨時都可開不一定要晚上開的會。我出雞，人家不一定會出豉油呢。

「我曾經在牧師面前哭著請你理一理我，你後來理我了，但好像只是維持了一個月。之後又是不聽電話，對你說話則是左耳入右耳出。我不明白你的同事你的朋友你的公司是如何能夠聯絡上你。做你的同事朋友倒好，好過做你的伴侶。做隻貓做隻狗不做情人，原來並不老套。如果你有預計我會致電找你的話，我勸你不如不要交電話費吧，反正是浪費金錢。

「我有心事，只能對兩隻狗說，因為我身邊無人有空分擔。你知道我近來有甚麼煩惱嗎？你大概不知，正如我不知道你一樣。我是故意不問你的，可能是要報復吧，但去到這地步我又覺得很恐怖。我很累了，我每次回家也覺得很無謂，每次吵架(或者你覺得是我罵你。態度不同吧了)我也覺得很無聊。見面如此，不如不見。

「即管去玩啦你。總有一天，我會豁出去玩個痛快，到時你別驚訝。」

做無線新聞真辛苦

從來事不關己，己不勞心。

所以我也預計不到自己聽到你說的那番話後，會有如此大的反應。連陳姑娘也看得出：「你近來好似好煩惱咁喎。」我也不想這樣，可是那情境，卻叫我震撼至今。

你叫我可以怎樣呢？正所謂手背又係肉，左手又係肉，周身都係肉。兩個都是我的好朋友，我發現自己在你們面前，詞窮了，枉有千言萬語講。

只希望你可以開開心心，他也可以開開心心。我不對「你們」說，你也知道我的立場吧？

事事關心我很樂意，多累也不怕。只望你好。